.. అమృతనాదోపనిషత్   ౨౧ ..
అమృతనాదోపనిషత్ప్రతిపాద్యం పరాక్షరమ్ .
త్రైపదానన్దసామ్రాజ్యం హృది మే భాతు సన్తతమ్ ..
౐ సహ నావవతు . సహ నౌ భునక్తు . సహ వీర్యం కరవావహై .
తేజస్వినావధీతమస్తు మా విద్విషావహై ..
౐ శాన్తిః శాన్తిః శాన్తిః ..
శాస్త్రాణ్యధీత్య మేధావీ అభ్యస్య చ పునః పునః .
పరమం బ్రహ్మ విజ్ఞాయ ఉల్కావత్తాన్యథోత్సృజేత్ .. ౧..
ఓఙ్కారం రథమారుహ్య విష్ణుం కృత్వాథ సారథిమ్ .
బ్రహ్మలోకపదాన్వేషీ రుద్రారాధనతత్పరః .. ౨..
తావద్రథేన గన్తవ్యం యావద్రథపథి స్థితః .
స్థిత్వా రథపథస్థానం రథముత్సృజ్య గచ్ఛతి .. ౩..
మాత్రాలిఙ్గపదం త్యక్త్వా శబ్దవ్యఞ్జనవర్జితమ్ .
అస్వరేణ మకారేణ పదం సూక్ష్మం చ గచ్ఛతి .. ౪..
శబ్దాదివిషయాః పఞ్చ మనశ్చైవాతిచఞ్చలమ్ .
చిన్తయేదాత్మనో రశ్మీన్ప్రత్యాహారః స ఉచ్యతే .. ౫..
ప్రత్యాహారస్తథా ధ్యానం ప్రాణాయామోఽథ ధారణా .
తర్కశ్చైవ సమాధిశ్చ షడఙ్గో యోగ ఉచ్యతే .. ౬..
యథా పర్వతధాతూనాం దహ్యన్తే ధమనాన్మలాః .
తథేన్ద్రియకృతా దోషా దహ్యన్తే ప్రాణనిగ్రహాత్ .. ౭..
ప్రాణాయామైర్దహేద్దోషాన్ధారణాభిశ్చ కిల్బిషమ్ .
ప్రత్యాహారేణ సంసర్గాద్ధ్యానేనానీశ్వరాన్గుణాన్ .. ౮..
కిల్బిషం హి క్షయం నీత్వా రుచిరం చైవ చిన్తయేత్ .. ౯..
రుచిరం రేచకం చైవ వాయోరాకర్షణం తథా .
ప్రాణాయామస్త్రయః ప్రోక్తా రేచపూరకకుమ్భకాః .. ౧౦..
సవ్యాహృతిం సప్రణవాం గాయత్రీం శిరసా సహ .
త్రిః పఠేదాయతప్రాణః ప్రాణాయామః స ఉచ్యతే .. ౧౧..
ఉత్క్షిప్య వాయుమాకాశం శూన్యం కృత్వా నిరాత్మకమ్ .
శూన్యభావేన యుఞ్జీయాద్రేచకస్యేతి లక్షణమ్ .. ౧౨..
వక్త్రేణోత్పలనాలేన తోయమాకర్షయేన్నరః .
ఏవం వాయుర్గ్రహీతవ్యః పూరకస్యేతి లక్షణమ్ .. ౧౩..
నోచ్ఛ్వసేన్న చ నిశ్వాసేత్ గాత్రాణి నైవ చాలయేత్ .
ఏవం భావం నియుఞ్జీయాత్ కుమ్భకస్యేతి లక్షణమ్ .. ౧౪..
అన్ధవత్పశ్య రూపాణి శబ్దం బధిరవత్ శృణు .
కాష్ఠవత్పశ్య తే దేహం ప్రశాన్తస్యేతి లక్షణమ్ .. ౧౫..
మనః సఙ్కల్పకం ధ్యాత్వా సంక్షిప్యాత్మని బుద్ధిమాన్ .
ధారయిత్వా తథాఽఽత్మానం ధారణా పరికీర్తితా .. ౧౬..
ఆగమస్యావిరోధేన ఊహనం తర్క ఉచ్యతే .
సమం మన్యేత యం లబ్ధ్వా స సమాధిః ప్రకీర్తితః .. ౧౭..
భూమిభాగే సమే రమ్యే సర్వదోషవివర్జితే .
కృత్వా మనోమయీం రక్షాం జప్త్వా చైవాథ మణ్డలే .. ౧౮..
పద్మకం స్వస్తికం వాపి భద్రాసనమథాపి వా .
బద్ధ్వా యోగాసనం సమ్యగుత్తరాభిముఖః స్థితః .. ౧౯..
నాసికాపుటమఙ్గుల్యా పిధాయైకేన మారుతమ్ .
ఆకృష్య ధారయేదగ్నిం శబ్దమేవాభిచిన్తయేత్ .. ౨౦..
ఓమిత్యేకాక్షరం బ్రహ్మ ఓమిత్యేకేన రేచయేత్ .
దివ్యమన్త్రేణ బహుశః కుర్యాదాత్మమలచ్యుతిమ్ .. ౨౧..
పశ్చాద్ధ్యాయీత పూర్వోక్తక్రమశో మన్త్రవిద్బుధః .
స్థూలాతిస్థూలమాత్రాయం నాభేరూర్ధ్వరుపక్రమః .. ౨౨..
తిర్యగూర్ధ్వమధో దృష్టిం విహాయ చ మహామతిః .
స్థిరస్థాయీ వినిష్కమ్పః సదా యోగం సమభ్యసేత్ .. ౨౩..
తాలమాత్రావినిష్కమ్పో ధారణాయోజనం తథా .
ద్వాదశమాత్రో యోగస్తు కాలతో నియమః స్మృతః .. ౨౪..
అఘోషమవ్యఞ్జనమస్వరం చ అకణ్ఠతాల్వోష్ఠమనాసికం చ .
అరేఫజాతముభయోష్మవర్జితం యదక్షరం న క్షరతే కదాచిత్
.. ౨౫..
యేనాసౌ పశ్యతే మార్గం ప్రాణస్తేన హి గచ్ఛతి .
అతస్తమభ్యసేన్నిత్యం సన్మార్గగమనాయ వై .. ౨౬..
హృద్ద్వారం వాయుద్వారం చ మూర్ధద్వారమతః పరమ్ .
మోక్షద్వారం బిలం చైవ సుషిరం మణ్డలం విదుః .. ౨౭..
భయం క్రోధమథాలస్యమతిస్వప్నాతిజాగరమ్ .
అత్యాహరమనాహరం నిత్యం యోగీ వివర్జయేత్ .. ౨౮..
అనేన విధినా సమ్యఙ్నిత్యమభ్యసతః క్రమాత్ .
స్వయముత్పద్యతే జ్ఞానం త్రిభిర్మాసైర్న సంశయః .. ౨౯..
చతుర్భిః పశ్యతే దేవాన్పఞ్చభిస్తుల్యవిక్రమః .
ఇచ్ఛయాప్నోతి కైవల్యం షష్ఠే మాసి న సంశయః .. ౩౦..
పార్థివః పఞ్చమాత్రస్తు చతుర్మాత్రాణి వారుణః .
ఆగ్నేయస్తు త్రిమాత్రోఽసౌ వాయవ్యస్తు ద్విమాత్రకః .. ౩౧..
ఏకమాత్రస్తథాకాశో హ్యర్ధమాత్రం తు చిన్తయేత్ .
సిద్ధిం కృత్వా తు మనసా చిన్తయేదాత్మనాత్మని .. ౩౨..
త్రింశత్పర్వాఙ్గులః ప్రాణో యత్ర ప్రాణః ప్రతిష్ఠితః .
ఏష ప్రాణ ఇతి ఖ్యాతో బాహ్యప్రాణస్య గోచరః .. ౩౩..
అశీతిశ్చ శతం చైవ సహస్రాణి త్రయోదశ .
లక్షశ్చైకోననిఃశ్వాస అహోరాత్రప్రమాణతః .. ౩౪..
ప్రాణ ఆద్యో హృదిస్థానే అపానస్తు పునర్గుదే .
సమానో నాభిదేశే తు ఉదానః కణ్ఠమాశ్రితః .. ౩౫..
వ్యానః సర్వేషు చాఙ్గేషు సదా వ్యావృత్య తిష్ఠతి .
అథ వర్ణాస్తు పఞ్చానాం ప్రాణాదీనామనుక్రమాత్ .. ౩౬..
రక్తవర్నో మణిప్రఖ్యః ప్రాణో వాయుః ప్రకీర్తితః .
అపానస్తస్య మధ్యే తు ఇన్ద్రగోపసమప్రభః .. ౩౭..
సమానస్తు ద్వయోర్మధ్యే గోక్షీరధవలప్రభః .
ఆపాణ్డర ఉదానశ్చ వ్యానో హ్యర్చిస్సమప్రభః .. ౩౮..
యస్యేదం మణ్డలం భిత్వా మారుతో యాతి మూర్ధని .
యత్ర తత్ర మ్రియేద్వాపి న స భూయోఽబిజాయతే .
న స భూయోఽభిజాయత ఇత్యుపనిషత్ .. ౩౯..
౐ సహ నావవత్వితి శాన్తిః ..
 .. ఇతి కృష్ణయజుర్వేదీయ అమృతనాదోపనిషత్సమాప్తా ..

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com