.. అక్ష్యుపనిషత్ ..
యత్సప్తభూమికావిద్యావేద్యానన్దకలేవరమ్ .
వికలేవరకైవల్యం రామచన్ద్రపదం భజే ..
౐ సహ నావవతు సహ నౌ భునక్తు
సహ వీర్యం కరవావహై .
తేజస్వినావధీతమస్తు మా విద్విషావహై ..
౐ శాన్తిః శాన్తిః శాన్తిః ..
హరిః ౐ ..
అథ హ సాంకృతిర్భగవానాదిత్యలోకం జగామ .
తమాదిత్యం నత్వా చాక్షుష్మతీవిద్యయా
తమస్తువత్ . ౐ నమో భగవతే శ్రీసూర్యా- 
యాక్షితేజసే నమః . ౐ ఖేచరాయ నమః .
౐ మహాసేనాయ నమః . ౐ తమసే నమః .
౐ రజసే నమః . ౐ సత్త్వాయ నమః .
౐ అసతో మా సద్గమయ . తమసో మా జ్యోతిర్గమయ .
మృత్యోర్మాఽమృతం గమయ . హంసో భగవా- 
ఞ్ఛుచిరూపః ప్రతిరూపః . విశ్వరూపం ఘృణినం
జాతవేదసం హిరణ్మయం జ్యోతీరూపం తపన్తమ్ .
సహస్రరశ్మిః శతధా వర్తమానః పురుషః
ప్రజానాముదయత్యేష సూర్యః . ౐ నమో
భగవతే శ్రీసూర్యాయాదిత్యాయాక్షితేజసేఽహోవాహిని
వాహిని స్వాహేతి . ఏవం చాక్షుష్మతీవిద్యయా స్తుతః
శ్రీసూర్యనారాయణః సుప్రీతోఽబ్రవీచ్చాక్షుష్మతీ- 
విద్యాం బ్రాహ్మణో యో నిత్యమధీతే న తస్యాక్షిరోగో
భవతి . న తస్య కులేఽన్ధో భవతి . అష్టౌ
బ్రాహ్మణాన్గ్రాహయిత్వాథ విద్యాసిద్ధిర్భవతి .
య ఏవం వేద స మహాన్భవతి .. ౧..
అథ హ సాంకృతిరాదిత్యం పప్రచ్ఛ భగవన్- 
బ్రహ్మవిద్యాం మే బ్రూహీతి . తమాదిత్యో హోవాచ .
సాంకృతే శృణు వక్ష్యామి తత్త్వజ్ఞానం సుదుర్లభమ్ .
యేన విజ్ఞాతమాత్రేణ జీవన్ముక్తో భవిష్యసి ..౧..
సర్వమేకమజం శాన్తమనన్తం ధ్రువమవ్యయమ్ .
పశ్యన్భూతార్థచిద్రూపం శాన్త ఆస్వ యథాసుఖమ్ .. ౨..
అవేదనం విదుర్యోగం చిత్తక్షయమకృత్రిమమ్ .
యోగస్థః కురు కర్మాణి నీరసో వాథ మా కురు .. ౩..
విరాగముపయాత్యన్తర్వాసనాస్వనువాసరమ్ .
క్రియాసూదారరూపాసు క్రమతే మోదతేఽన్వహమ్ .. ౪..
గ్రామ్యాసు జడచేష్టాసు సతతం విచికిత్సతే .
నోదాహరతి మర్మాణి పుణ్యకర్మాణి సేవతే .. ౫..
అనన్యోద్వేగకారీణి మృదుకర్మాణి సేవతే .
పాపాద్బిభేతి సతతం న చ భోగమపేక్షతే .. ౬..
స్నేహప్రణయగర్భాణి పేశలాన్యుచితాని చ .
దేశకాలోపపన్నాని వచనాన్యభిభాషతే .. ౭..
మనసా కర్మణా వాచా సజ్జనానుపసేవతే .
యతః కుతశ్చిదానీయ నిత్యం శాస్త్రాణ్యవేక్షతే .. ౮..
తదాసౌ ప్రథమామేకాం ప్రాప్తో భవతి భూమికామ్ .
ఏవం విచారవాన్యః స్యాత్సంసారోత్తరణం ప్రతి .. ౯..
స భూమికావానిత్యుక్తః శేషస్త్వార్య ఇతి స్మృతః .
విచారనామ్నీమితరామాగతో యోగభూమికామ్ .. ౧౦..
శ్రుతిస్మృతిసదాచారధారణాధ్యానకర్మణః .
ముఖ్యయా వ్యాఖ్యయాఖ్యాతాఞ్ఛ్రయతి శ్రేష్ఠపణ్డితాన్ .. ౧౧..
పదార్థప్రవిభాగజ్ఞః కార్యాకార్యవినిర్ణయమ్ .
జానాత్యధిగతశ్చాన్యో గృహం గృహపతిర్యథా .. ౧౨..
మదాభిమానమాత్సర్యలోభమోహాతిశాయితామ్ .
బహిరప్యాస్థితామీషత్యజత్యహిరివ త్వచమ్ .. ౧౩..
ఇత్థంభూతమతిః శాస్త్రగురుసజ్జనసేవయా .
సరహస్యమశేషేణ యథావదధిగచ్ఛతి .. ౧౪..
అసంసర్గాభిధామన్యాం తృతీయాం యోగభూమికామ్ .
తతః పతత్యసౌ కాన్తః పుష్పశయ్యామివామలామ్ .. ౧౫..
యథావచ్ఛాస్త్రవాక్యార్థే మతిమాధాయ నిశ్చలామ్ .
తాపసాశ్రమవిశ్రాన్తైరధ్యాత్మకథనక్రమైః .
శిలాశయ్యాసనాసీనో జరయత్యాయురాతతమ్ .. ౧౬..
వనావనివిహారేణ చిత్తోపశమశోభినా .
అసఙ్గసుఖసౌఖ్యేన కాలం నయతి నీతిమాన్ .. ౧౭..
అభ్యాసాత్సాధుశాస్త్రాణాం కరణాత్పుణ్యకర్మణామ్ .
జన్తోర్యథావదేవేయం వస్తుదృష్టిః ప్రసీదతి .. ౧౮..
తృతీయాం భూమికాం ప్రాప్య బుద్ధోఽనుభవతి స్వయమ్ .. ౧౯..
ద్విప్రకారసంసర్గం తస్య భేదమిమం శ్రుణు .
ద్వివిధోఽయమసంసర్గః సామాన్యః శ్రేష్ఠ ఏవ చ .. ౨౦..
నాహం కర్తా న భోక్తా చ న బాధ్యో న చ బాధకః .
ఇత్యసంజనమర్థేషు సామాన్యాసఙ్గనామకమ్ .. ౨౧..
ప్రాక్కర్మనిర్మితం సర్వమీశ్వరాధీనమేవ వా .
సుఖం వా యది వా దుఃఖం కైవాత్ర తవ కర్తృతా .. ౨౨..
భోగాభోగా మహారోగాః సంపదః పరమాపదః .
వియోగాయైవ సంయోగా ఆధయో వ్యాధయో ధియామ్ .. ౨౩..
కాలశ్చ కలనోద్యుక్తః సర్వభావాననారతమ్ .
అనాస్థయేతి భావానాం యదభావనమాన్తరమ్ .
వాక్యార్థలబ్ధమనసః సమాన్యోఽసావసఙ్గమః .. ౨౪..
అనేన క్రమయోగేన సంయోగేన మహాత్మనామ్ .
నాహం కర్తేశ్వరః కర్తా కర్మ వా ప్రాక్తనం మమ .. ౨౫..
కృత్వా దూరతరే నూనమితి శబ్దార్థభావనమ్ .
యన్మౌనమాసనం శాన్తం తచ్ఛ్రేష్ఠాసఙ్గ ఉచ్యతే .. ౨౬..
సన్తోషామోదమధురా ప్రథమోదేతి భూమికా .
భూమిప్రోదితమాత్రోఽన్తరమృతాఙ్కురికేవ సా .. ౨౭..
ఏషా హి పరిమృష్టాన్తః సంన్యాసా ప్రసవైకభూః .
ద్వితీయాం చ తృతీయాం చ భూమికాం ప్రాప్నుయాత్తతః .. ౨౮..
శ్రేష్ఠా సర్వగతా హ్యేషా తృతీయా భూమికాత్ర హి .
భవతి ప్రోజ్ఝితాశేషసంకల్పకలనః పుమాన్ .. ౨౯..
భూమికాత్రితయాభ్యాసాదజ్ఞానే క్షయమాగతే .
సమం సర్వత్ర పశ్యన్తి చతుర్థీం భూమికాం గతాః .. ౩౦..
అద్వైతే స్థైర్యమాయాతే ద్వైతే చ ప్రశమం గతే .
పశ్యన్తి స్వప్నవల్లోకం చతుర్థీం భూమికాం గతాః .. ౩౧..
భూమికాత్రితయం జాగ్రచ్చతుర్థీ స్వప్న ఉచ్యతే .. ౩౨..
చిత్తం తు శరదభ్రాంశవిలయం ప్రవిలీయతే .
సత్త్వావశేష ఏవాస్తే పఞ్చమీం భూమికాం గతః .. ౩౩..
జగద్వికల్పో నోదేతి చిత్తస్యాత్ర విలాపనాత్ .
పఞ్చమీం భూమికామేత్య సుషుప్తపదనామికామ్ .
శాన్తాశేషవిశేషాంశస్తిష్ఠత్యద్వైతమాత్రకః .. ౩౪..
గలితద్వైతనిర్భాసో ముదితోఽతఃప్రబోధవాన్ .
సుషుప్తమన ఏవాస్తే పఞ్చమీం భూమికాం గతః .. ౩౫..
అన్తర్ముఖతయాతిష్ఠన్బహిర్వృత్తిపరోఽపి సన్ .
పరిశ్రాన్తతయా నిత్యం నిద్రాలురివ లక్ష్యతే .. ౩౬..
కుర్వన్నభ్యాసమేతస్యాం భూమికాయాం వివాసనః .
షష్ఠీం తుర్యాభిధామన్యాం క్రమాత్పతతి భూమికామ్ .. ౩౭..
యత్ర నాసన్నసద్రూపో నాహం నాప్యహంకృతిః .
కేవలం క్షీణమననమాస్తేఽద్వైతేఽతినిర్భయః .. ౩౮..
నిర్గ్రన్థిః శాన్తసన్దేహో జీవన్ముక్తో విభావనః .
అనిర్వాణోఽపి నిర్వాణశ్చిత్రదీప ఇవ స్థితః .. ౩౯..
షష్ఠ్యాం భూమావసౌ స్థిత్వా సప్తమీం భూమిమాప్నుయాత్ .. ౪౦..
విదేహముక్తతాత్రోక్తా సప్తమీ యోగభూమికా .
అగమ్యా వచసాం శాన్తా సా సీమా సర్వభూమిషు .. ౪౧..
లోకానువర్తనం త్యక్త్వా త్యక్త్వా దేహానువర్తనమ్ .
శాస్త్రానువర్తనం త్యక్త్వా స్వాధ్యాసాపనయం కురు .. ౪౨..
ఓఙ్కారమాత్రమఖిలం విశ్వప్రాజ్ఞాదిలక్షణమ్ .
వాచ్యవాచ్యకతాభేదాభేదేనానుపలబ్ధితః .. ౪౩..
అకారమాత్రం విశ్వః స్యాదుకారతైజసః స్మృతః .
ప్రాజ్ఞో మకార ఇత్యేవం పరిపశ్యేత్క్రమేణ తు .. ౪౪..
సమాధికాలాత్ప్రాగేవ విచిన్త్యాతిప్రయత్నతః .
స్థులసూక్ష్మక్రమాత్సర్వం చిదాత్మని విలాపయేత్ .. ౪౫..
చిదాత్మానం నిత్యశుద్ధబుద్ధముక్తసదద్వయః .
పరమానన్దసన్దేహో వాసుదేవోఽహఓమితి .. ౪౬..
ఆదిమధ్యావసానేషు దుఃఖం సర్వమిదం యతః .
తస్మాత్సర్వం పరిత్యజ్య తత్త్వనిష్ఠో భవానఘ .. ౪౭..
అవిద్యాతిమిరాతీతం సర్వాభాసవివర్జితమ్ .
ఆనన్దమమలం శుద్ధం మనోవాచామగోచరమ్ .. ౪౮..
ప్రజ్ఞానఘనమానన్దం బ్రహ్మాస్మీతి విభావయేత్ .. ౪౯..
ఇత్యుపనిషత్ ..
౐ సహ నావవతు . సహ నౌ భునక్తు . సహ వీర్యం కరవావహై .
తేజస్వినావధీతమస్తు మా విద్విషావహై ..
౐ శాన్తిః శాన్తిః శాన్తిః ..
హరిః ౐ తత్సత్ ..
ఇత్యలక్ష్యుపనిషత్ ..

Encoded by Sunder Hattangadi (sunderh@hotmail.com)

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com