.. అక్షమాలికోపనిషత్ ..
అకారాదిక్షకారాన్తవర్ణజాతకలేవరమ్ .
వికలేవరకైవల్యం రామచన్ద్రపదం భజే ..
౐ వాఙ్మే మనసి ప్రతిష్ఠితా మనో మే వాచి
ప్రతిష్ఠితమావిరావీర్మ ఏధి .. వేదస్య మ ఆణీస్థః
శ్రుతం మే మా ప్రహాసీరనేనాధీతేనారాత్రా- 
న్సన్దధామ్యృతం వదిష్యామి సత్యం వదిష్యామి ..
తన్మామవతు తద్వక్తారమవతు అవతు మామవతు
వక్తారమవతు వక్తారమ్ ..
౐ శాన్తిః శాన్తిః శాన్తిః ..
హరిః ౐ . అథ ప్రజాపతిర్గుహం పప్రచ్ఛ భో
బ్రహ్మన్నక్షమాలాభేదవిధిం బ్రూహీతి . సా కిం
లక్షణా కతి భేదా అస్యాః కతి సూత్రాణి కథం
ఘటనాప్రకారః కే వర్ణాః కా ప్రతిష్ఠా
కైషాధిదేవతా కిం ఫలం చేతి . తం గుహః
ప్రత్యువాచ ప్రవాలమౌక్తికస్ఫటికశఙ్ఖ- 
రజతాష్టాపదచన్దనపుత్రజీవికాబ్జే రుద్రాక్షా
ఇతి . ఆదిక్షాన్తమూర్తిః సావధానభావా .
సౌవర్ణం రాజతం తామ్రం తన్ముఖే ముఖం
తత్పుచ్ఛే పుచ్ఛం తదన్తరావర్తనక్రమేణ
యోజయేత్ . యదస్యాన్తరం సూత్రం తద్బ్రహ్మ .
యద్దక్షపార్శ్వే తచ్ఛైవమ్ . యద్వామే
తద్వైష్ణవమ్ . యన్ముఖం సా సరస్వతీ .
యత్పుచ్ఛం సా గాయత్రీ . యత్సుషిరం సా
విద్యా . యా గ్రన్థిః సా ప్రకృతిః . యే స్వరాస్తే
ధవలాః . యే స్పర్శాస్తే పీతాః . యే పరాస్తే
రక్తాః . అథ తాం పఞ్చభిర్గన్ధైరమృతైః
పఞ్చభిర్గవ్యైస్తనుభిః శోధయిత్వా
పఞ్చభిర్గవ్యైర్గన్ధోదకేన సంస్రాప్య
తస్మాత్సోఙ్కారేణ పత్రకూర్చేన స్నపయిత్వా- 
ష్టభిర్గన్ధైరాలిప్య సుమనఃస్థలే
నివేశ్యాక్షతపుష్పైరారాధ్య ప్రత్యక్ష- 
మాదిక్షాన్తైర్వర్ణైర్భావయేత్ . ఓమఙ్కార
మృత్యుఞ్జయ సర్వవ్యాపక ప్రథమేఽక్షే ప్రతితిష్ఠ .
ఓమాఙ్కారాకర్షణాత్మకసర్వగత ద్వితీయేఽక్షే ప్రతితిష్ఠ .
ఓమిఙ్కారపుష్టిదాక్షోభకర తృతీయేఽక్షే ప్రతితిష్ఠ .
ఓమీఙ్కార వాక్ప్రసాదకర నిర్మల చతుర్థేఽక్షే ప్రతితిష్ఠ .
ఓముఙ్కార సర్వబలప్రద సారతర పఞ్చమేఽక్షే ప్రతితిష్ఠ .
ఓమూఙ్కారోచ్చాటన దుఃసహ షష్ఠేఽక్షే ప్రతితిష్ఠ .
ఓమృఙ్కాకార సంక్షోభకర చఞ్చల సప్తమేఽక్షే ప్రతితిష్ఠ .
ఓమౄఙ్కార సంమోహనకరోజవలాష్టమేఽక్షే ప్రతితిష్ఠ .
ఓమ్లృఙ్కారవిద్వేషణకర మోహక నవమేఽక్షే ప్రతితిష్ఠ .
ఓమ్లౄఙ్కార మోహకర దశమేఽక్షే ప్రతితిష్ఠ .
ఓమేఙ్కార సర్వవశ్యకర శుద్ధసత్త్వైకాదశేఽక్షే ప్రతితిష్ఠ .
ఓమైఙ్కార శుద్ధసాత్త్విక పురుషవశ్యకర ద్వాదశేఽక్షే ప్రతితిష్ఠ .
ఓమోఙ్కారాఖిలవాఙ్మయ నిత్యశుద్ధ త్రయోదశేఽక్షే ప్రతితిష్ఠ .
ఓమౌఙ్కార సర్వవాఙ్మయ వశ్యకర చతుర్దశేఽక్షే ప్రతితిష్ఠ .
ఓమఙ్కార గజాదివశ్యకర మోహన పఞ్చదశేఽక్షే ప్రతితిష్ఠ .
ఓమఃకార మృత్యునాశనకర రౌద్ర షోడశేఽక్షే ప్రతితిష్ఠ .
౐ కఙ్కార సర్వవిషహర కల్యాణద సప్తదశేఽక్షే ప్రతితిష్ఠ .
౐ ఖఙ్కార సర్వక్షోభకర వ్యాపకాష్టాదశేఽక్షే ప్రతితిష్ఠ .
౐ గఙ్కార సర్వవిఘ్నశమన మహత్తరైకోనవింశేఽక్షే ప్రతితిష్ఠ .
౐ ఘఙ్కార సౌభాగ్యద స్తమ్భనకర వింశేఽక్షే ప్రతితిష్ఠ .
౐ ఙకార సర్వవిషనాశకరోగ్రైకవింశేఽక్షే ప్రతితిష్ఠ .
౐ చఙ్కారాభిచారఘ్న క్రూర ద్వావింశేఽక్షే ప్రతితిష్ఠ .
౐ ఛఙ్కార భూతనాశకర భీషణ త్రయోవింశేఽక్షే ప్రతితిష్ఠ .
౐ జఙ్కార కృత్యాదినాశకర దుర్ధర్ష చతుర్వింశేఽక్షే ప్రతితిష్ఠ .
౐ ఝఙ్కార భూతనాశకర పఞ్చవింశేఽక్షే ప్రతితిష్ఠ .
౐ ఞకార మృత్యుప్రమథన షడ్వింశేఽక్షే ప్రతితిష్ఠ .
౐ టఙ్కార సర్వవ్యాధిహర సుభగ సప్తవింశేఽక్షే ప్రతితిష్ఠ .
౐ ఠఙ్కార చన్ద్రరూపాష్టావింశేఽక్షే ప్రతితిష్ఠ .
౐ డఙ్కార గరుడాత్మక విషఘ్న శోభనైకోనత్రింశేఽక్షే ప్రతితిష్ఠ .
౐ ఢఙ్కార సర్వసంపత్ప్రద సుభగ త్రింశేఽక్షే ప్రతితిష్ఠ .
౐ ణఙ్కార సర్వసిద్ధిప్రద మోహకరైకత్రింశేఽక్షే ప్రతితిష్ఠ .
౐ తఙ్కార ధనధాన్యాదిసంపత్ప్రద ప్రసన్న ద్వాత్రింశేఽక్షే ప్రతితిష్ఠ .
౐ థఙ్కార ధర్మప్రాప్తికర నిర్మల త్రయస్త్రింశేఽక్షే ప్రతితిష్ఠ .
౐ దఙ్కార పుష్టివృద్ధికర ప్రియదర్శన చతుస్త్రింశేఽక్షే ప్రతితిష్ఠ .
౐ ధఙ్కార విషజ్వరనిఘ్న విపుల పఞ్చత్రింశేఽక్షే ప్రతితిష్ఠ .
౐ నఙ్కార భుక్తిముక్తిప్రద శాన్త షట్త్రింశేఽక్షే ప్రతితిష్ఠ .
౐ పఙ్కార విషవిఘ్ననాశన భవ్య సప్తత్రింశేఽక్షే ప్రతితిష్ఠ .
౐ ఫఙ్కారాణిమాదిసిద్ధిప్రద జ్యోతీరూపాష్టత్రింశేఽక్షే ప్రతితిష్ఠ .
౐ బఙ్కార సర్వదోషహర శోభనైకోనచత్వారింశేఽక్షే ప్రతితిష్ఠ .
౐ భఙ్కార భూతప్రశాన్తికర భయానక చత్వారింశేఽక్షే ప్రతితిష్ఠ .
౐ మఙ్కార విద్వేషిమోహనకరైకచత్వారింశేఽక్షే ప్రతితిష్ఠ .
౐ యఙ్కార సర్వవ్యాపక పావన ద్విచత్వారింశేఽక్షే ప్రతితిష్ఠ .
౐ రఙ్కార దాహకర వికృత త్రిచత్వారింశేఽక్షే ప్రతితిష్ఠ .
౐ లఙ్కార విశ్వంభర భాసుర చతుశ్చత్వారింశేఽక్షే ప్రతితిష్ఠ .
౐ వఙ్కార సర్వాప్యాయనకర నిర్మల పఞ్చచత్వారింశేఽక్షే ప్రతితిష్ఠ .
౐ శఙ్కార సర్వఫలప్రద పవిత్ర షట్చత్వారింశేఽక్షే ప్రతితిష్ఠ .
౐ షఙ్కార ధర్మార్థకామద ధవల సప్తచత్వారింశేఽక్షే ప్రతితిష్ఠ .
౐ సఙ్కార సర్వకారణ సార్వవర్ణికాష్టచత్వారింశేఽక్షే ప్రతితిష్ఠ .
౐ హఙ్కార సర్వవాఙ్మయ నిర్మలైకోనపఞ్చాశదక్షే ప్రతితిష్ఠ .
౐ ళఙ్కార సర్వశక్తిప్రద ప్రధాన పఞ్చాశదక్షే ప్రతితిష్ఠ .
౐ క్షఙ్కార పరాపరతత్త్వజ్ఞాపక పరంజ్యోతీరూప శిఖామణౌ ప్రతితిష్ఠ .
అథోవాచ యే దేవాః పృథివీపదస్తేభ్యో నమో
భగవన్తోఽనుమదన్తు శోభాయై పితరోఽనుమదన్తు
శోభాయై జ్ఞానమయీమక్షమాలికామ్ .
అథోవాచ యే దేవా అన్తరిక్షసదస్తేభ్యః  ౐ నమో
భగవన్తోఽనుమదన్తు శోభాయై పితరోఽనుమదన్తు
శోభాయైజ్ఞానమయీమక్షమాలికామ్ .
అథోవాచ యే దేవా దివిషదస్తేభ్యో నమో
భగవన్తోఽనుమదన్తు శోభాయై పితరోఽనుమదన్తు
శోభాయై జ్ఞానమయీమక్షమాలికామ్ .
అథోవాచ యే మన్త్రా యా విద్యాస్తేభ్యో
నమస్తాభ్యశ్చోన్నమస్తచ్ఛక్తిరస్యాః
ప్రతిష్ఠాపయతి .
అథోవాచ యే బ్రహ్మవిష్ణురుద్రాస్తేభ్యః
సగుణేభ్య ౐ నమస్తద్వీర్యమస్యాః
ప్రతిష్ఠాపయతి .
అథోవాచ యే సాఙ్ఖ్యాదితత్త్వభేదాస్తేభ్యో
నమో వర్తధ్వం విరోధేఽనువర్తధ్వమ్ .
అథోవాచ యే శైవా వైష్ణవాః శాక్తాః
శతసహస్రశస్తేభ్యో నమోనమో భగవన్తోఽ- 
నుమదన్త్వనుగృహ్ణన్తు .
అథోవాచ యాశ్చ మృత్యోః ప్రాణవత్యస్తాభ్యో
నమోనమస్తేనైతం మృడయత మృడయత .
పునరేతస్యాం సర్వాత్మకత్వం భావయిత్వా భావేన
పూర్వమాలికాముత్పాద్యారభ్య తన్మయీం
మహోపహారైరుపహృత్య ఆదిక్షాన్తైరక్షరైరక్ష- 
మాలామష్టోత్తరశతం స్పృశేత్ .
అథ పునరుత్థాప్య ప్రదక్షిణీకృత్యోం నమస్తే
భగవతి మన్త్రమాతృకేఽక్షమాలే
సర్వవశఙ్కర్యోంనమస్తే భగవతి మన్త్రమాతృకేఽ- 
క్షమాలికే శేషస్తమ్భిన్యోంనమస్తే భగవతి
మన్త్రమాతృకేఽక్షమాలే ఉచ్చాటన్యోంనమస్తే
భగవతి మన్త్రమాతృకేఽక్షమాలే విశ్వామృత్యో
మృత్యుఞ్జయస్వరూపిణి సకలలోకోద్దీపిని సకలలోక- 
రక్షాధికే సకలలోకోజ్జీవికే సకలలోకోత్పాదికే
దివాప్రవర్తికే రాత్రిప్రవర్తికే నద్యన్తరం యాసి
దేశాన్తరం యాసి ద్వీపాన్తరం యాసి లోకాన్తరం
యాసి సర్వదా స్ఫురసి సర్వహృది వాససి .
నమస్తే పరారూపే నమస్తే పశ్యన్తీరూపే నమస్తే
మధ్యమారూపే నమస్తే వైఖరీరూపే సర్వతత్త్వాత్మికే
సర్వవిద్యాత్మికే సర్వశక్త్యాత్మికే సర్వదేవాత్మికే
వసిష్ఠేన మునినారాధితే విశ్వామిత్రేణ
మునినోపజీవ్యమానే నమస్తే నమస్తే .
ప్రాతరధీయానో రాత్రికృతం పాపం నాశయతి .
సాయమధీయానో దివసకృతం పాపం నాశయతి .
తత్సాయంప్రాతః ప్రయుఞ్జానః పాపోఽపాపోభవతి .
ఏవమక్షమాలికయా జప్తో మన్త్రః సద్యః సిద్ధికరో
భవతీత్యాహ భగవాన్గుహః ప్రజాపతిమిత్యుపనిఅషత్ ..
౐ వాఙ్ మే మనసి ప్రతిష్ఠితా మనో మే వాచి
ప్రతిష్ఠితమావిరావీర్మ ఏధి .. వేదస్య మ ఆణీస్థః
శ్రుతం మే మా ప్రహాసీరనేనాధీతేనాహోరాత్రా- 
న్సన్దధామ్యృతం వదిష్యామి సత్యం వదిష్యామి .
తన్మామవతు తద్వక్తారమవతు అవతు మామవతు
వక్తారమవతు వక్తారమ్ ..
౐ శాన్తిః శాన్తిః శాన్తిః .. హరిః ౐ తత్సత్ ..
ఇత్యక్షమాలికోపనిషత్సమాప్తా ..

Encoded by Sunder Hattangadi (sunderh@hotmail.com)

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com