.. అఘనాశకగాయత్రీస్తోత్ర ..
ఆదిశక్తే జగన్మాతర్భక్తానుగ్రహకారిణి |
సర్వత్ర వ్యాపికేఽనన్తే శ్రీసంధ్యే తే నమోఽస్తు తే ||
త్వమేవ సంధ్యా గాయత్రీ సావిత్రి చ సరస్వతీ |
బ్రాహ్మీ చ వైష్ణవీ రౌద్రీ రక్తా శ్వేతా సితేతరా ||
ప్రాతర్బాలా చ మధ్యాహ్నే యౌవనస్థా భవేత్పునః |
వృద్ధా సాయం భగవతీ చిన్త్యతే మునిభిః సదా ||
హంసస్థా గరుడారూఢా తథా వృషభవాహినీ |
ఋగ్వేదాధ్యాయినీ భూమౌ దృశ్యతే యా తపస్విభిః ||
యజుర్వేదం పఠన్తీ చ అన్తరిక్షే విరాజతే |
సా సామగాపి సర్వేషు భ్రామ్యమాణా తథా భువి ||
రుద్రలోకం గతా త్వం హి విష్ణులోకనివాసినీ |
త్వమేవ బ్రహ్మణో లోకేఽమర్త్యానుగ్రహకారిణీ ||
సప్తర్షిప్రీతిజననీ మాయా బహువరప్రదా |
శివయోః కరనేత్రోత్థా హ్యశ్రుస్వేదసముద్భవా ||
ఆనన్దజననీ దుర్గా దశధా పరిపఠ్యతే |
వరేణ్యా వరదా చైవ వరిష్ఠా వరర్వ్ణినీ ||
గరిష్ఠా చ వరాహీ చ వరారోహా చ సప్తమీ |
నీలగంగా తథా సంధ్యా సర్వదా భోగమోక్షదా ||
భాగీరథీ మర్త్యలోకే పాతాలే భోగవత్యపి ||
త్రిలోకవాహినీ దేవీ స్థానత్రయనివాసినీ ||
భూర్లోకస్థా త్వమేవాసి ధరిత్రీ శోకధారిణీ |
భువో లోకే వాయుశక్తిః స్వర్లోకే తేజసాం నిధిః ||
మహర్లోకే మహాసిద్ధిర్జనలోకే జనేత్యపి |
తపస్వినీ తపోలోకే సత్యలోకే తు సత్యవాక్ ||
కమలా విష్ణులోకే చ గాయత్రీ బ్రహ్మలోకగా |
రుద్రలోకే స్థితా గౌరీ హరార్ధాంగీనివాసినీ ||
అహమో మహతశ్చైవ ప్రకృతిస్త్వం హి గీయసే |
సామ్యావస్థాత్మికా త్వం హి శబలబ్రహ్మరూపిణీ ||
తతః పరాపరా శక్తిః పరమా త్వం హి గీయసే |
ఇచ్ఛాశక్తిః క్రియాశక్తిర్జ్ఞానశక్తిస్త్రిశక్తిదా ||
గంగా చ యమునా చైవ విపాశా చ సరస్వతీ |
సరయూర్దేవికా సిన్ధుర్నర్మదేరావతీ తథా ||
గోదావరీ శతద్రుశ్చ కావేరీ దేవలోకగా |
కౌశికీ చన్ద్రభాగా చ వితస్తా చ సరస్వతీ ||
గణ్డకీ తాపినీ తోయా గోమతీ వేత్రవత్యపి |
ఇడా చ పింగలా చైవ సుషుమ్ణా చ తృతీయకా ||
గాంధారీ హస్తిజిహ్వా చ పూషాపూషా తథైవ చ |
అలమ్బుషా కుహూశ్చైవ శంఖినీ ప్రాణవాహినీ ||
నాడీ చ త్వం శరీరస్థా గీయసే ప్రాక్తనైర్బుధైః |
హృతపద్మస్థా ప్రాణశక్తిః కణ్ఠస్థా స్వప్ననాయికా ||
తాలుస్థా త్వం సదాధారా బిన్దుస్థా బిన్దుమాలినీ |
మూలే తు కుణ్డలీ శక్తిర్వ్యాపినీ కేశమూలగా ||
శిఖామధ్యాసనా త్వం హి శిఖాగ్రే తు మనోన్మనీ |
కిమన్యద్ బహునోక్తేన యత్కించిజ్జగతీత్రయే ||
తత్సర్వం త్వం మహాదేవి శ్రియే సంధ్యే నమోఽస్తు తే |
ఇతీదం కీర్తితం స్తోత్రం సంధ్యాయాం బహుపుణ్యదమ్ ||
మహాపాపప్రశమనం మహాసిద్ధివిధాయకమ్ |
య ఇదం కీర్తయేత్ స్తోత్రం సంధ్యాకాలే సమాహితః ||
అపుత్రః ప్రాప్నుయాత్ పుత్రం ధనార్థీ ధనమాప్నుయాత్ |
సర్వతీర్థతపోదానయజ్ఞయోగఫలం లభేత్ ||
భోగాన్ భుక్త్వా చిరం కాలమన్తే మోక్షమవాప్నుయాత్ |
తపస్విభిః కృతం స్తోత్రం స్నానకాలే తు యః పఠేత్ ||
యత్ర కుత్ర జలే మగ్నః సంధ్యామజ్జనజం ఫలమ్ |
లభతే నాత్ర సందేహః సత్యం చ నారద ||
శ్రృణుయాద్యోఽపి తద్భక్త్యా స తు పాపాత్ ప్రముచ్యతే |
పీయూషసదృశం వాక్యం సంధ్యోక్తం నారదేరితమ్ ||
|| ఇతి శ్రీఅఘనాశక గాయత్రీ స్తోత్రం సమ్పూర్ణమ్ ||

Visit http://www.webdunia.com for additional texts with Hindi meanings.

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com