.. ఆత్మబోధోపనిషత్ ..
.. ఆత్మబోధోపనిషత్ ..    42
శ్రీమన్నారాయణాకారమష్టాక్షరమహాశయమ్ .
స్వమాత్రానుభవాత్సిద్ధమాత్మబోధం హరిం భజే ..
౐ వాఙ్మే మనసీతి శాన్తిః ..
౐ ప్రత్యగానన్దం బ్రహ్మపురుషం ప్రణవస్వరూపం అకార ఉకార
మకార ఇతి త్ర్యక్షరం ప్రణవం తదేతదోమితి . యముక్త్వా ముచ్యతే
యోగీ జన్మసంసారబన్ధనాత్ . ౐ నమో నారాయణాయ
శఙ్ఖచక్రగదాధరాయ తస్మాత్ ౐ నమో నారాయణాయేతి
మన్త్రోపాసకో వైకుణ్ఠభవనం గమిష్యతి . అథ యదిదం
బ్రహ్మపురం పుణ్డరీకం తస్మాత్తడితాభమాత్రం
దీపవత్ప్రకాశమ్ ..
బ్రహ్మణ్యో దేవకీపుత్రో బ్రహ్మణ్యో మధుసూదనః .
బ్రహ్మణ్యః పుణ్డరీకాక్షో బ్రహ్మణ్యో విష్ణురచ్యుతః ..
సర్వభూతస్థమేకం నారాయణం కారణపురుషమకారణం పరం
బ్రహ్మోమ్ . శోకమోహవినిర్ముక్తో విష్ణుం ధ్యాయన్న సీదతి .
ద్వైతాద్వైతమభయం భవతి . మృత్యోః స మృత్యుమాప్నోతి య ఇహ
నానేవ పశ్యతి . హృత్పద్మమధ్యే సర్వం యత్తత్ప్రజ్ఞానే
ప్రతిష్ఠితమ్ . ప్రజ్ఞానేత్రో లోకః ప్రజ్ఞా ప్రతిష్ఠా
ప్రజ్ఞానం బ్రహ్మ . స ఏతేన
ప్రజ్ఞేనాత్మనాస్మాల్లోకాదుత్క్రమ్యాముష్మిన్స్వర్గే లోకే
సర్వాన్కామానాప్త్వాఽమృతః సమభవదమృతః సమభవత్ .
యత్ర జ్యోతిరజస్రం యస్మింల్లోకేఽభ్యర్హితమ్ . తస్మిన్మాం దేహి
స్వమానమృతే లోకే అక్షతే అచ్యుతే లోకే అక్షతే అమృతత్వం చ
గచ్ఛత్యోం నమః .. ౧..
ప్రగలితనిజమాయోఽహం నిస్తులదృశిరూపవస్తుమాత్రోఽహమ్ .
అస్తమితాహన్తోఽహం ప్రగలితజగదీశజీవభేదోఽహమ్ .. ౧..
ప్రత్యగభిన్నపరోఽహం విధ్వస్తాశేషవిధినిషేధోఽహమ్ .
సముదస్తాశ్రమితోఽహం ప్రవితతసుఖపూర్ణసంవిదేవాహమ్ .. ౨..
సాక్ష్యహమనపేక్షోఽహం నిజమహిమ్ని సంస్థితోఽహమచలోఽహమ్ .
అజరోఽహమవ్యయోఽహం పక్షవిపక్షాదిభేదవిధురోఽహమ్ .. ౩..
అవబోధైకరసోఽహం మోక్షానన్దైకసిన్ధురేవాహమ్ .
సూక్ష్మోఽహమక్షరోఽహం విగలితగుణజాలకేవలాత్మాఽహమ్ .. ౪..
నిస్త్రైగుణ్యపదోఽహం కుక్షిస్థానేకలోకకలనోఽహమ్ .
కూటస్థచేతనోఽహం నిష్క్రియధామాహమప్రతర్క్యోఽహమ్ .. ౫..
ఏకోఽహమవికలోఽహం నిర్మలనిర్వాణమూర్తిరేవాహమ్ .
నిరవయోఽహమజోఽహం కేవలసన్మాత్రసారభూతోఽహమ్ .. ౬..
నిరవధినిజబోధోఽహం శుభతరభావోఽహమప్రభేద్యోఽహమ్ .
విభురహమనవద్యోఽహం నిరవధినిఃసీమతత్త్వమాత్రోఽహమ్ .. ౭..
వేద్యోఽహమగమాస్తైరారాధ్యోఽహం సకలభువనహృద్యోఽహమ్ .
పరమానన్దఘనోఽహమ్ పరమానన్దైకభూమరూపోఽహమ్ .. ౮..
శుద్ధోఽహమద్వయోఽహం సన్తతభావోఽహమాదిశూన్యోఽహమ్ .
శమితాన్తత్రితయోఽహం బద్ధో ముక్తోఽహమద్భుతాత్మాహమ్ .. ౯..
శుద్ధోఽహమాన్తరోఽహం శాశ్వతవిజ్ఞానసమరసాత్మాహమ్ .
శోధితపరతత్త్వోఽహం బోధానన్దైకమూర్తిరేవాహమ్ .. ౧౦..
వివేకయుక్తిబుద్ధ్యాహం జానామ్యాత్మానమద్వయమ్ .
తథాపి బన్ధమోక్షాదివ్యవహారః ప్రతీయతే .. ౧౧..
నివృత్తోఽపి ప్రపఞ్చో మే సత్యవద్భాతి సర్వదా .
సర్పాదౌ రజ్జుసత్తేవ బ్రహ్మసత్తైవ కేవలమ్ .
ప్రపఞ్చాధారరూపేణ వర్తతేఽతో జగన్న హి .. ౧౨..
యథేక్షురససంవ్యాప్తా శర్కరా వర్తతే తథా .
అద్వయబ్రహ్మరూపేణ వ్యాప్తోఽహం వై జగత్త్రయమ్ .. ౧౩..
బ్రహ్మాదికీటపర్యన్తాః ప్రాణినో మయి కల్పితాః .
బుద్బుదాదివికారాన్తస్తరఙ్గః సాగరే యథా .. ౧౪..
తరఙ్గస్థం ద్రవం సిన్ధుర్న వాఞ్ఛతి యథా తథా .
విషయానన్దవాఞ్ఛా మే మా భూదానన్దరూపతః .. ౧౫..
దారిద్ర్యాశా యథా నాస్తి సంపన్నస్య తథా మమ .
బ్రహ్మానన్దే నిమగ్నస్య విషయాశా న తద్భవేత్ .. ౧౬..
విషం దృష్ట్వాఽమృతం దృష్ట్వా విషం త్యజతి
బుద్ధిమాన్ .
ఆత్మానమపి దృష్ట్వాహమనాత్మానం త్యజామ్యహమ్ .. ౧౭..
ఘటావభాసకో భానుర్ఘటనాశే న నశ్యతి .
దేహావభాసకః సాక్షీ దేహనాశే న నశ్యతి .. ౧౮..
న మే బన్ధో న మే ముక్తిర్న మే శాస్త్రం న మే గురుః .
మాయామాత్రవికాసత్వాన్మాయాతీతోఽహమద్వయః .. ౧౯..
ప్రాణాశ్చలన్తు తద్ధర్మైః కామైర్వా హన్యతాం మనః .
ఆనన్దబుద్ధిపూర్ణస్య మమ దుఃఖం కథం భవేత్ .. ౨౦..
ఆత్మానమఞ్జసా వేద్మి క్వాప్యజ్ఞానం పలాయితమ్ .
కర్తృత్వమద్య మే నష్టం కర్తవ్యం వాపి న క్వచిత్ .. ౨౧..
బ్రాహ్మణ్యం కులగోత్రే చ నామసౌన్దర్యజాతయః .
స్థూలదేహగతా ఏతే స్థూలాద్భిన్నస్య మే నహి .. ౨౨..
క్షుత్పిపాసాన్ధ్యబాధిర్యకామక్రోధాదయోఽఖిలాః .
లిఙ్గదేహగతా ఏతే హ్యలిఙ్గస్య న సన్తి హి .. ౨౩..
జడత్వప్రియమోదత్వధర్మాః కారణదేహగాః .
న సన్తి మమ నిత్యస్య నిర్వికారస్వరూపిణః .. ౨౪..
ఉలూకస్య యథా భానురన్ధకారః ప్రతీయతే .
స్వప్రకాశే పరానన్దే తమో మూఢస్య జాయతే .. ౨౫..
చక్షుర్దృష్టినిరోధేఽభ్రైః సూర్యో నాస్తీతి మన్యతే .
తథాఽజ్ఞానావృతో దేహీ బ్రహ్మ నాస్తీతి మన్యతే .. ౨౬..
యథామృతం విషాద్భిన్నం విషదోషైర్న లిప్యతే .
న స్పృశామి జడాద్భిన్నో జడదోషాన్ప్రకాశతః .. ౨౭..
స్వల్పాపి దీపకణికా బహులం నాశయేత్తమః .
స్వల్పోఽపి బోధో నిబిడే బహులం నాశయేత్తమః .. ౨౮..
కాలత్రయే యథా సర్పో రజ్జౌ నాస్తి తథా మయి .
అహఙ్కారాదిదేహాన్తం జగన్నాస్త్యహమద్వయః .. ౨౯..
చిద్రూపత్వాన్న మే జాడ్యం సత్యత్వాన్నానృతం మమ .
ఆనన్దత్వాన్న మే దుఃఖమజ్ఞానాద్భాతి సత్యవత్ .. ౩౦..
ఆత్మప్రబోధోపనిషదం ముహూర్తముపాసిత్వా న స పునరావర్తతే న
స పునరావర్తత ఇత్యుపనిషత్ ..
౐ వాఙ్మే మనసీతి శాన్తిః ..
ఇతి ఆత్మబోధోపనిషత్సమాప్తా ..

Encoded by Sunder Hattangadi (sunderh@hotmail.com)

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com