.. ఆర్యాపఞ్చదశీస్తోత్రమ్ ..
కరకలితచాపబాణాం కల్హారాఙ్ఘ్రిం నమామి కల్యాణీమ్ .
కందర్పదర్పజననీం కలుషహరాం కామితార్థఫలదాత్రీమ్ .. ౧ ..
ఏషా స్తోతుమ్ వాణీ నైవ సమర్థా తవేశి మహిమానమ్ .
శేషోఽప్యబ్దసహస్రైః శేషం కృతవాన్ మహేశి తవ చరితమ్ .. ౨ ..
ఈశిత్వాదిసుపూజ్యామిన్దిన్దిరకేశాభారసూల్లసితామ్ .
ఇన్దీవరదలనయనామీప్సితదాత్రీం నమామి శర్వాణీమ్ .. ౩ ..
లసదరుణభానుకోటిద్యుతినిధిమమ్బాం సురేన్ద్రలక్ష్యపదామ్ .
లలితాం నమామి బాలే లలితశివహృదయకమలకలహంసీమ్ .. ౪ ..
హ్రీంకారబీజరూపే హిమగిరికన్యే హరీన్ద్రభవవన్ద్యే .
హిమకరధవలచ్ఛత్రే హితాయ భవ నః సదా మహారాజ్ఞి .. ౫ ..
హర్షోత్కరజనయిత్రీ హసితజ్యోత్స్నా తవేయమనవద్యే .
హరగలహాలాహలమపి హరతి త్రైలోక్యమోహతిమిరం తే .. ౬ ..
సకలమనోరథదానే సత్యపి చరణే నతస్య తవ నిపుణే .
సంసేవ్యతే సురతరుః సదాజ్ఞలోకైర్ను కృచ్ఛ్రఫలదాతా .. ౭ ..
కనకరుచే చటులగతే కఠినస్తనభారనమ్రకృశమధ్యే .
కాన్తే కఙ్కణహస్తే కమ్బుగ్రీవే నమోఽస్తు తే కరుణే .. ౮ ..
హరనయనానన్దకరే హరాఙ్కసంస్థే హరిప్రముఖవన్ద్యే .
హరనటనసాక్షిభూతే హరార్ధదేహే నమోఽస్తు తే సుకృపే .. ౯ ..
లక్ష్మీప్రదకరుణా యా లక్ష్మీపతిమల్పమమ్బ కర్తుమలమ్ .
లక్ష్యమ్ కురు మాం తస్యా లావణ్యామృతతరఙ్గమాలే త్వమ్ .. ౧౦ ..
హ్రీంకారరత్నగర్భే హేమాచలమన్దరస్తనోల్లసితే .
హేరమ్బప్రియజనని హే వసుధే దేహి మే క్షమాం నిత్యమ్ .. ౧౧ ..
సత్సంప్రదాయవిదితే సకలాగమనిగమసారతత్త్వమయి .
సావిత్ర్యర్పయ వదనే సకలరసాశ్రయసువాక్సుధాధారామ్ .. ౧౨ ..
కరకఙ్కణమణిదినమణికరవికసితచరణకమలమకరన్దమ్ .
కరుణాపయోనిధే మే కామాక్షి స్వాన్తషట్పదః పిబతు .. ౧౩ ..
లసదిక్షుచాపసుమశరలక్షితదోర్వల్లివీర్యమభయేన .
లక్షాధికదైత్యకులం లవుపటవాసం కృతం కథం చిత్రమ్ .. ౧౪ ..
హ్రీంకారకేలిభవనే హిమకరమౌల్యఙ్కమఞ్జుపర్యఙ్కే .
హృదయసరోజే మే వస హృదయానన్దప్రబోధపరహంసి .. ౧౫ ..
ఆర్యాపఞ్చదశీం తామార్యాం యో భజతి శుద్ధధీర్నిత్యమ్ .
భార్యే లక్ష్మీవాణ్యౌ పర్యాతాత్ తస్య సాదరం భవతః .. ౧౬ ..
ఇత్యానన్దనాథపాదపద్మోపజీవినా కాశ్యపగోత్రోత్పన్నేనాన్ధ్రేణ
త్యాగరాజనామ్నా విరచితమార్యాపఞ్చదశీస్తోత్రం సంపూర్ణమ్


Encoded and proofread by Sridhar  Seshagiri seshagir@egr.msu.edu

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com